Сән эталондарының рЭволюциясы

Бүгінде сұлулықтың идеалы ретінде бұрынғы «90-60-60» стандартына сай сұңғақ әрі аққұба модель аруларды үлгі тұтудың қажеті жоқ. Сән әлеміндегі жаңа тренд: «классикалық» модельдермен қатар қара не азиялық нәсілді және plus-size өлшемді модельдер.

Өткен 2016 жылы фэшн-индустрияда  дәстүрлі сұлулық стандарттары басым күшінен айырылып, әйел көркіне деген жаңаша көзқарас орныға бастады деп мәлімдейді америкалық TheDailyBeast басылымы. Fashion Spot сән қауымдастығының мәлімдеуінше алдыңғы үш жылмен салыстырғанда былтыр қара нәсілді модельдер гламур журналдар мұқабасына көбірек шыққан. 48 халықаралық сән басылымдарының  647 мұқабасының 29%-ында (197) еуропалықтан өзге нәсілді арулар жарияланған. Сән подиумдарында да дәл осындай үрдіс байқалуда: 2017 жылдың көктем маусымына арналған Нью-Йорк, Милан, Париж және Лондон сән апталарына қатысқан модельдердің 25,4%-ның тегі ақ нәсілді емес.

Бұл үрдіс қазіргі мәдениет саласындағы тең құқық қағидаларымен түсіндіріледі. Былтырғы жылдың Оскар сыйлығына бірде бір қара нәсіл өкілінің ұсынылмауы афроамерикалықтар тарапынан үлкен дау тудырғаны көпшілік есінде болар.

Қазіргі таңда модельдермен қатар танымал актрисалар мен шоу-бизнес өкілдері де сән журналдарына жиі шығып тұрады. Қара нәсілді арулар басылым нөмірінің сатылуына қаншалықты ықпал ете алатыны жөнінде деректер жоқ, бірақ Бейонсе, Рианна және Мишель Обама мұқабасына шыққан журналдар таралымы жақсы.

сән журналдарының мұқабасы

Fashion Spot басылымы сондай-ақ plus-size (үлкен өлшемді), егде жастағы және трансгендер модельдердің де нарықтағы жағдайымен танысып шықты. Зерттеу қорытындысы бүгінде поп-мәдениетте трансгендер әйелдердің танымалдығы артып отырғанын көрсетті. Тележұлдыз Хари Неф сән журналдарының мұқабасына 4 рет шыққан. Актриса Лаверна Кокс, модель Андреа Пежич және YouTube жұлдызы Джаз Дженнингс те осындай жетістіктермен мақтана алады.

толық модельдерСән стандарттарынан бөлек, әйел сымбатын қабылдау мәселесі соңғы жылдары ойын-сауық және фэшн-индустрияда кең талқыға салынуы жылтыр журналдарға да ықпалын тигізуде. 2015 жылы Sports Illustrated спорттық журналы бірыңғай арықша келген модельдерді шақыру дәстүрінен бас тартып, өз тарихында алғаш рет «плюс» өлшемді модельді түсірілімге шақырды, бұл австралиялық Робин Лоули болатын.  Ал 2016 жылдың арнайы нөмірінің мұқабасына осы санаттағы ең атақты модель Эшли Грэмнің суреті шықса, журналдың қосымша мұқабасында ММА жұлдызы Ронда Роузи бейнеленді. Эшли Грэмнің суреттері, сондай-ақ әйгілі Vogue, Harper’s Bazaar, Glamour және Elle UK басылымдарынан орын тапты.

Осы сияқты Мелисса Маккарти, Ребел Уилсон, Лесли Джонс және әнші Адель де түрлі журналдар мұқабаларына түсіп, Fashion Spot сарапшыларының назарына ілікті. Аталмыш басылымның шеф-редакторы Дженнифер Дэвидсонның айтуынша, толық модельдер қарапайым әйелдерге дүкеннен өздеріне лайық киім таңдауға көмектеседі. Үлкен өлшемді әйелдерге көбірек таңдаулар ұсынылуы керек және оларға арналған бөлімдер дүкеннің бір қуысында жасырын жатпауы тиіс.

Брендтер мен дизайнерлер тұтынушылармен диалогты әрі қарай дамытып, ауқымын кеңейте түспек. Масс-маркет алпауыты Mango-ның өзі ұсыныстар қатарын арттырып, үлкен өлшемді киімдерді шығара бастады. Осылайша бүгінгі сән саласындағы стандарттарды өндірушілер мен жарнамалаушылар емес, тұтынушының өзі белгілеп отыр деп айта аламыз.

Пікірлер

Пікір жазыңыз

Ваш e-mail не будет опубликован.

Мына мақалалар да ұнап қалар?