Қыздармен алғашқы сырласу: етеккір

Қыздармен алғашқы сырласу: етеккір Денсаулық

Қазіргі кезде тастанды балалар, оң жақта отырып жүкті болып қалған қыздар, бақытсыз әйел, басқа да күрделі проблемалардың туындау себебі ана мен қызының арасындағы «құпия әңгіменің» болмауы деп ойлаймын. Бастапқыда қарапайым физиологиядан басталған әңгіме нағыз сырласуға, жақындасуға әкеледі.

Бүгінгі таңда балалар әлдеқайда шапшан, белсенді. Кейбір ата-ана өз баласына «ақырзаман баласы, осының білмейтіні жоқ» деп, еркелетіп жатқанын естуге болады. Содан да болар, өкінішке орай, ата –ана арасында көп нәрсені бала өзі түсініп алар деп, ойлайтындар кездесіп жатады. Ал шын мәнісінде, балаға өмірдің қайсібір кезеңіне оның ата-анасы дайындық жасағаны өте маңызды.  Әсіресе, қыз балаға.

Қыз бала 7-8 жасқа толғанда, оның денесінде көптеген өзгерістер пайда бола бастайды.  Етеккірі келуіне біраз уақыт бар болса да, жыныстық жетілудің алғашқы белгілері байқалады. Қолтық астында және жыныс мүшесінің үстіне түк шығады. Бойы ұзарып, салмақ қосылады. Емшек үрпісі өсіп, сүт бездері дөңгелене бастайды. Бұл өзгерістердің барлығы 2-3 жыл ішінде анық байқалады, ал етеккірдің басталуы – қыз бала ағзасының ұрықтануға дайын екендігінің белгісі.

Етеккір – сыртқы жыныс ағзаларынан сатылы түрде қанды бөлінулердің пайда болуы. Бұл айлық жыныс торшаларының жетіліп, жатырдың кілегейлі қабығының сатылы өсуімен тығыз байланысты. Егер етеккір қыз балаға 10 жастан бұрын немесе 16 жасқа дейін келмесе, міндетті түрде дәрігерге көріну керек.

Ата-анасы алдын ала дайындаған болса қыз бала етеккірдің алғашқы келуін сабырмен қабылдайды. Кері жағдайда қыз бала жыныс мүшелерінен бөлінген қанды көріп, шошып кетуі де мүмкін.

Сонымен, қыздар арасындағы құпия сұхбат құру үшін, алдын ала жоспар дайындаңыз.

Ерекше назар аударуды қажет ететін детальдер:

сырлы сұхбатқа қолайлы жерді және уақытты таңдаңыз. Сіздерге ешкім кедергі жасамауы, назарыңызды бөлмеуі тиіс.

Қатаң, дөрекі сөйлемеңіз. Бұл әңгімеге кері әсерін тигізеді. Қыз баланы өзіңізге баурап алуға тырысыңыз.

Әр сөзіңіз түсінікті болғаны абзал. Терминдерді айтқыңыз келсе, әрқайсын түсіндіріңіз. Симптомдарға тоқталыңыз – етеккірдің алғаш келуі, бел немесе іштің төменгі жағының тартылып, ауру мүмкіндігі, етеккірдің созылу уақыты, қайта келу циклы, жеке бас гигиенасы.

Қыз баланың жаңа ақпаратты барынша дұрыс әрі тез қабылдауы үшін өз тәжірибеңізді бөлісіңіз. Сіз де кішкентай кезде осындай кезеңдерден қалай өткеніңізді айтуыңызға болады.

Сонымен қатар қыз балаға мына ақпараттарды айта кеткен жөн:

  • Етеккірдің басталуы қыз баланың жеке бас гигиена ережелерін қатаң ұстануын талап етеді. Әдетте, дені сау, спортпен шұғылданатын, жақсы тамақтанатын қыз баланың етеккірі ауырлық туғызбай, жақсы өтеді.
  • Етеккір кезінде ауыр физикалық жұмыстар жасамаған дұрыс. Қыз бала ауыр зат көтермегені жөн.
  • Етеккір кезінде сыртқы жыныс мүшесін таза ұстағаны маңызды.
  • Қыз бала жыныс мүшесін алдынан артқа қарай жылы сумен жууы керек.
  • Жыныс мүшесін тәулігіне кем дегенде екі рет жуу керек.
  • Етеккір кезінде ваннаға, бассейн, өзен, көлдерге суға түсуге болмайды. Өйткені менструация ауру тудырғыш микробтарға жол ашады да жыныс мүшесінің қабынуына әкеледі.
  • Етеккір кезінде булы моншаға түспеген дұрыс.
  • Күнтізбе құрып, оған етеккір басталу күнін, және ұзақтылығын жазып отырған дұрыс. Алғашқы күнтізбені жасауға көмектесіңіз. Тіпті арнайы блокнот сыйлап, мұны өз ритуалдарыңызға айналдырыңыз.
  • Етеккір кезінде ащы тағам жемеген абзал. Себебі олар қан ағуын күшейтеді.
  • Етеккір кезінде жылы киініп жүрген дұрыс.
arular.kz
Rate author
Қыз-келіншектерге арналған ақпараттық-танымдық сайт